لەوەتەی ناوەڕاستی ئەم مانگەوە زنجیرەیەكی تەلەڤزیۆنی بەناوی (Jinn) واتە جنۆكە، لەسەر كەناڵی نێتفلیكس نمایش دەكرا، بەڵام بە هۆی تۆماركردنی چەند گرتەیەكی نەگونجاو لە ناو یەكێك لە شوێنەوارەكانی ئوردن، ناڕەزاییەكی زۆر لە ناو ڕای گشتی و شەقامی ئوردنی دروست بوو.
لە ڕۆژی 13ی ئەم مانگەوە درامای (Jinn) لە پەخشی نێتفلیكس نمایش كرا، بەڵام چەند رۆژێك دوای نمایشكردنی ناڕەزاییەكی توند لەلایەن هاووڵاتیانی ئوردن دروست بوو.
بەشێك لە چالاكوانە ئوردنیەكان لە تۆڕە كۆمەڵایەتییەكان نووسیویانە لەناو دراماكە چەند دەستەواژەیەكی سەیر و ورووژێنەر لە ناو شوێنەواری بەترای دەگوترێ كە ئەمەش لەگەڵ دابونەریتی وڵاتی ئوردن ناگونجێ، بۆیە حكومەتی وڵاتەكە و چەند كوتلەیەكی ناو پەرلەمان بەرپرسیارن لەوەی كە چۆن ڕێگە بەوە دراوە درامایەكی لەم جۆرە لەم شوێنەوارە گرنگەی وڵاتەكەیان وێنە بگیرێت.
لەسەر ئەم بابەتەش داواكاری گشتی لە ئوردن هاتووەتە سەر هێڵ داوای لە دەستەی گشتی ئاسایشی وڵاتەكە كردووە ڕێوشوێنی تایبەت بگرنە بەر بۆ وەستانی زنجیرەكە لەسەر كەناڵی نێتفلێكس.
