چەند گرووپێکی کلتووریی ژمارەیەک وڵاتی جیاواز بەرهەمە هونەرییەکانیان لە ڕانیە پێشکەش دەکەن

19/09/2019 - 20:07 بڵاوکراوەتەوە لە كولتور و هونەر

وابڕیارە ئەمشەو لە پاڕکی دەروازەی شارۆچکەی رانیە، فێستیڤاڵی نێودەوڵەتی ئاڵوگۆڕی کولتووری نەتەوە جیاوازەکان بەڕێوە بچێت.

 

خالید قادر، سەرپەرشتیاری سەنتەری ڕایەڵ بۆ ئاڵوگۆڕی کلتووری بە (باسنیوز) ی ڕاگەیاند: "ئەمشەو لەلایەن سەنتەری ڕایەڵەوە بەبەشداری هەشت گرووپی جیهانی فێستیڤاڵی کولتوورە جیاوازەکان لە ڕانیە بەڕێوەدەچێت".

 

گوتیشی: "ئامانج لەو فێستیڤاڵە هونەرییە گەیاندنی پەیامی ئاشتیە بە نەتەوەکانی دیکەی جیهان و ئاسوودەکردنی دەروونی هاووڵاتیانە کە بەهۆی شەڕی نەخوازراوی داعشەوە لەماوەی ساڵانی ڕابردوودا کوردستان تووشی هات و دەمانەوێت بەم فێستیڤاڵانە ئاسوودەیان بکەین".

 

ڕوونیشیکردەوە، لە فێستیڤاڵەکەدا جگە لە چەند گرووپێكی كوردستان چەندین گرووپی هونەری و کولتووری وڵاتانی دیكە بۆ ئەمساڵ بەشدار دەبن و چالاکییە هونەری و کولتوورییەکانیان نمایش دەکەن.

 

ئاماژەی بۆ ئەوەش کرد، فێستیڤاڵەكە سێ شەو بەردەوام دەبێت بە بەشداری گرووپەكانی ئوردن، هیندستان، مەغریب، میسر، عێراق، مەکسیک، ئێران، خوراسان و چەندین تیپی میللی و هونەری لە شارەکانی هەولێر و سلێمانی و دهۆک و کەرکوک بەڕێوەدەچێت.

 

فێتیڤاڵی کولتوورە جیاوازەکان بەشێکی زۆری نەتەوە جیاوازەکان تیایدا بەشداری دەکەن و ماوەی شەش ساڵە لە شارۆچکەی ڕانیە بەڕێوەدەچێت و ئەمساڵیش لەسەر ئەرکی وەزارەتی ڕۆشنبیری هەر لە ڕانیە بەڕێوەدەچێت.