چركه‌
خوله‌ك
كاتژمێر
ڕۆژ

شادی جەزا: بە دەنگی (بەڵێ) پشتگیریی له‌ ڕیفراندۆم دەکەم

شادی جەزا، خانمە هونەرمەندی کورد، پشتگریی خۆی بۆ ئەنجامدانی ڕیفراندۆم بۆ سەربەخۆیی کوردستان دووپات کردەوە، هەروەها بە پێویستی دەزانێت گەلی کوردستان بە (بەڵێ) ده‌نگ بۆ سەربەخۆیی بدەن.

 

شادی جەزا، لەبارەی ئەنجامدانی ڕیفراندۆم بۆ سەربەخۆیی کوردستان، بە (باسنیوز)ـی ڕاگەیاند: "بە دەنگی (بەڵێ) پشتگیریی ڕیفراندۆم بۆ سەربەخۆیی کوردستان دەکەم، هیوادارم هەموو گەلی کورد بە دەنگی (بەڵێ) بەشداریی ڕیفراندۆم بکەن".

 

ئەو خانمە هونەرمەندە، داواشی کرد، بەبێ ڕچاوکردنی بیروڕای حزبی خەڵک بەشداریی ڕیفراندۆم بکەن، گوتیشی: "هیوادارم کێشەکان بەلاوە بنرێت و پاش ڕیفراندۆم ژیان و گوزەرانی خەڵک باشتر بکرێت، هەروەها ڕیفراندۆم بۆ هیچ حزب و لایەنێک نیە، بەڵکو بۆ تەواوی گەلی کوردە".

 

شادی جەزا، خەڵکی سلێمانیە، بەشداریی لە چەندین فیلم و زنجیرە دراما و شانۆگەرییدا کردووە.

 

لەگەڵ دیارییکردنی ڕۆژی ئەنجامدانی ڕیفراندۆم بۆ سەربەخۆیی کوردستان، ژمارەیەکی بەرچاو لە هونەرمەندانی کورد، لە ڕێگەی کەمپینێکەوە پشتگیریی خۆیان بۆ ئەنجامدانی ڕیفراندۆم بۆ سەربەخۆیی کوردستان دووپات کردەوە.

 

لە کۆبوونەوەی ڕۆژی چوارشەممەی مانگی ڕابردوودا، 2017/6/7، مەسعود بارزانی، سەرۆکی هەرێمی کوردستان لەگەڵ نوێنەر و سەرکردەی حزب و لایەنە سیاسییەکانی کوردستان، بڕیار درا ڕۆژی 25ـی ئەیلوولی 2017، ریفراندۆمی سەربەخۆیی کوردستان لە هەرێمی کوردستان، کەرکوک و ناوچە کوردستانییەکانی دەرەوەی ئیدارەی هەرێمی کوردستان ئەنجام بدرێت.