ریفراندۆم.. سووککردنی ئەرکی نەوەکانی ئایندەی کوردستان

ئەوەی لەو ریفراندۆمەدا کرا له‌ ڕابردوودا نەكراوه‌ و باوه‌ڕ ناكه‌م بۆ داهاتووش كه‌س بتوانێ ئه‌و هه‌نگاوه‌ بنێت

محەمەدی حاجی مەحمود 18/09/2018 - 13:27 بڵاوکراوەتەوە لە ڕیفراندۆم

وه‌كوو هەر مرۆڤێكی دیکەی ئازادیخواز، هەموو کوردێکی نەتەوەیی و نیشتمانپەروەر كار بۆ ئه‌وه‌ ده‌كات له‌ژێر چه‌پۆك و ژێرده‌سته‌یی ئازاد و سه‌ربه‌خۆ بێت. بەتایبەتی کە بە چاوی خۆی دەبینێت وڵاتى وا هه‌یه‌، کە ژمارەی دانیشتووانی و تەنانەت ڕووبەری خاکەکەیشی هەر هێندەی پارێزگایەکی کوردستان، کەچی سه‌ربه‌خۆیه‌ و ئاڵا و دەنگ و رەنگی له‌ دنیادا هه‌یه‌، لە بەرامبەردا كورد به‌م نیشتمانه‌ پان و پۆڕ و گەورە و بەم ژمارەی زۆرەی دانیشتووانییەوە، تا ئێستا ژێرده‌سته‌ بێت. ئه‌مانه‌ ڕه‌نگه‌ هه‌مووى هانده‌ر بن بۆ ئه‌وه‌ى ئێمه‌ش بیر له‌وه‌ بكه‌ینه‌وه‌ سه‌ربه‌خۆ و ئازاد بین. جگە لەمەش، لەکاتێکدا خه‌بات و تێكۆشانى زیاتر لە 100 ساڵه‌ى میلله‌تى كورد لەپێناو ئازادى و سه‌ربه‌خۆیى، کە تا ئەمڕۆش به‌رده‌وامه‌ و خوێنى بۆ ده‌ڕێژێت، کەچی زۆر له‌ میللەتانی دونیا هەن بەبێ هیچ گێرمە و کێشەیەک و خەباتێکی خوێناوی، بەڵکوو تەنیا به‌ ڕیفراندۆمێک، به‌ خۆپیشاندانێك، بە کۆبوونەوە و بڕیارێکی نێودەوڵەتی، سه‌ربه‌خۆیى خۆیان به‌ده‌ست هێناوه‌، به‌ڵام بۆ كورد وا دیاره‌ گه‌یشتووه‌ته‌ ئه‌و قۆناغانه‌ و هێشتاش ئەم مافەی پێ ڕەوا نابیندرێت.


لەڕاستیدا ڕاپەڕینی ئادارى ساڵى 1991 بۆ میلله‌تى كورد له‌ ڕووى نه‌ته‌وه‌یی و نیشتمانى و سیاسی و سه‌ربازى و دیبلۆماسی و ئابوورى و دارایی و كۆمه‌ڵایه‌تییه‌وه‌، وه‌چه‌رخانێكى گه‌وره‌ بووه‌، چونكه‌ هه‌موو ئه‌مانه‌ گۆڕانی به‌سه‌ردا هات و كورد هه‌ستى كرد خه‌ریكه‌ نیمچه‌ كیانێك بۆ خۆى دروست ده‌كات، به‌ جۆرێك هه‌رچه‌نده‌ خاوه‌نى كیانى خۆمان نه‌بووین، به‌ڵام كورد چێژى نیمچه‌ ئازادییه‌كى چه‌شت و 12 ساڵ له‌ژێر چاودێریى نه‌ته‌وه‌ یه‌كگرتووه‌كان و وڵاتانى زلهێزدا مایەوە، تا دواى ڕووخانى ڕژێمى عێراق، کە ئه‌و بوارە بۆ كورد فراوانتر بوو و بۆ یه‌كه‌مین جار له‌ مێژووى خۆیدا، کورد توانی هەموو کوردستان له‌ مه‌نده‌لییه‌وه‌ تا زاخۆ، ئازاد بكات، هه‌موو ئه‌وانه‌یش هه‌ستە نه‌ته‌وایه‌تى و نیشتمانییه‌كه‌ى کوردیان زیاتر كرد، چونكه‌ تۆ كاتێك له‌ ڕووى نیشتمانییه‌وه‌ خاكه‌كه‌ت ئازاد بوو، پرسه‌ نه‌ته‌وایه‌تییه‌كەت زاڵتر ده‌بێت. کەواتە ئه‌مانه‌ هه‌مووى هه‌نگاوى گرنگ بوون تا گه‌یشته‌ دروستبوونى داعش، ئه‌و ڕێكخراوه‌ تیرۆریستییه‌ی کە توانى له‌ ماوه‌یه‌كى كه‌مدا به‌شێكى گه‌وره‌ له‌ سوپا و پۆلیسى عێراقی له‌ مووسڵ و زۆربه‌ى ناوچه‌كانى دیكه‌ چه‌ك بكات، به‌ڵام ته‌نیا هێزێك به‌ ده‌ستى به‌تاڵ توانى به‌ره‌نگارى ئه‌و ڕێكخراوه‌ ببێته‌وه‌، كورد بوو، بێگومان كورد له‌ شه‌ڕی داعشدا، كه‌ شه‌ڕێكى گه‌وره‌ى نێوده‌وڵه‌تى بووه، بەو پێیەی داعش تەنیا ڕێكخراوێكى سیاسی و سه‌ربازىی ئاسایی نه‌بووه‌، به‌ڵكوو ڕێكخراوێك بوو له‌ڕووى ئیداری و ئابوورى و په‌یوه‌ندیى له‌گه‌ڵ دنیای دەرەوەی خۆیدا، فراوان بووه‌، بۆ نموونە كاتێك عێراق ئازاد كرا، كه‌س نه‌یتوانى به‌په‌له‌ و خێرا نه‌وت بفرۆشێت، تەنانەت له‌ كوردستاندا دواى 12 ساڵ كورد بیرى له‌وه‌ كرده‌وه‌ نه‌وت بفرۆشێت، کەچی داعش دواى سێ ڕۆژ لە گرتنی موسڵ و ناوچەکانی دیکە، نه‌وتى فرۆشت، ئەمەش بەو‌ ماناىە دێت کەوا داعش ڕێكخراوێكى به‌تواناى خاوه‌ن كادرى تەکنیکی بووه‌ له‌ ڕووى ئابووری و جیۆلۆجى و ته‌كنەلۆژیاوه‌، هه‌روه‌ها به‌رنامه‌ى خوێندنى گۆڕى و چه‌ندین بڕیارى جۆراوجۆرى دەر‌كرد.


هه‌رچه‌نده‌ داعش له‌ %40 خاكى عێراق و له‌ 50% خاكى سووریاشی گرتبوو، به‌ڵام دواجار كورد به‌گژ ئه‌و ڕێكخراوه‌ گه‌وره‌یه‌دا چووه‌وه‌ و توانى له‌ 40%ی خاكى كوردستان و عێراق له‌ ده‌ستى داعش وه‌ربگرێته‌وه‌ و بۆ یه‌كه‌مین جاریش داعش له‌سه‌ر ده‌ستى كورد شكا و هەر کوردیش دوا بزمارى له‌ تابووتى داعش دا، ئیتر هه‌موو ئه‌وانه‌ هۆكارى بوون، کە كورد به‌ وڵاتانى ده‌رەوه‌ بڵێت: چیم ده‌وێ.


هه‌رچه‌نده‌ ساڵى 2005 كورد به‌ شێوه‌یه‌كى نافه‌رمى ڕیفراندۆمى كرد و ئه‌وكاته‌ له‌ 99%ی كوردستان ده‌نگى به‌ سەربەخۆیی خۆی و جیابوونەوە لە عێراق‌ دا، به‌ڵام به‌داخه‌وه‌ ئه‌و كاته‌ سوودى لێ نه‌بینرا و ئەنجامەکەیان برده‌ به‌غدا و لەوێ پلە و پۆست و پاره‌یان پێ وه‌رگرت. به‌ڵام ئه‌مجاره‌ بڕیارمان دا ڕیفراندۆم بكه‌ین، به‌تایبه‌تى شه‌خسى به‌ڕێز كاك مه‌سعود بارزانى توانى شتێكى گه‌وره‌ بۆ مێژووی شه‌خسى خۆى، بۆ حزبه‌كه‌ى و بەتایبەتیش بۆ كورد بكات. واتە له‌سه‌ر ده‌ستى به‌ڕێز كاك مه‌سعود، ئه‌و ڕیفراندۆمه‌ سه‌ركه‌وتنێكى گه‌وره‌ی بەدەست هێنا، چونكه‌ تا ئه‌و كاته‌، هه‌موو ئەو خوێن و كوشتاره‌ بۆ ئۆتۆنۆمی، بۆ ژێرده‌سته‌یی، بۆ برابچووكیى عێراق بوو، به‌ڵام لە ڕیفراندۆمدا و دوای ئەم هەموو مێژووەی خەبات و قوربانیدانە، بۆ یه‌كه‌مین جار بوو له‌ مێژووى دوور و نزیكى خۆیدا، كورد به‌دیار چاوى هه‌موو دنیادا بڵێت: “من جیابوونه‌وه‌م ده‌وێت”، كه‌ ڕه‌نگه‌ ئەمە شتێكى ئاسان نه‌بێت، تەنانەت كه‌سیش جورئه‌تى ئه‌وه‌ى لە ڕابردوودا نەبووە و باوه‌ڕ ناكه‌م بۆ داهاتووش كه‌س بتوانێ ئه‌و هه‌نگاوه‌ بنێت و ئەو داوایە بکات، کەچی بارزانی کردی.


بۆیه‌ من پێموایه‌، ئه‌و كه‌سانه‌ى له‌ ڕیفراندۆم و پشتیووانیكردنى ڕیفراندۆمدا بەشدار بوون، دەسکەوتێکیان بۆ مێژوو تۆمار کرد، چونکە ڕیفراندۆم ئه‌وه‌نده‌ به‌هێز بوو، هه‌تا دۆست و ناحه‌ز و دوژمنه‌كانى كوردیش لە ئاستیدا هه‌مووى بوون به‌ یه‌ك، هه‌روه‌ها دوژمنى دوژمنیشمان، هه‌موویان له‌ دژى كورد بوون به‌ یه‌ك، هه‌موویان بەیەکەوە سه‌نگه‌ریان له‌ دژى كورد گرت. تەنانەت ئه‌وانه‌ى له‌ناو خۆى كوردستانیشدا دژى ڕیفراندۆم بوون، جورئه‌تیان نه‌بوو ڕۆژى ڕیفراندۆم بەئاشکرایی بڵێن (نا). كورد توانى ڕۆژى 25/9 بكات به‌ ڕۆژێكى مێژوویى و هه‌موو وڵاتانى دنیا بڵێن: (كورد لە 25/9/2017دا بڕیاریان دا له‌ عێراق جیا ببنه‌وه)‌، بۆیه‌ ئه‌و ڕیفراندۆمه‌ بوو به‌ شتێكى گرنگ، ڕیفراندۆم تاپۆیه‌كى ڕه‌شه‌ و دانراوه‌ بۆ كاتى خۆى. هاوکات به‌هۆى ئه‌و ڕیفراندۆمه‌وه‌ سێ خاڵى گرنگمان بۆ ڕوون بووه‌وه‌:


یه‌كه‌م: ئه‌و دیموكراسی و مافى مرۆڤه‌ى كه‌ ئه‌مەریكا و ئه‌وروپا و نه‌ته‌وه‌یه‌كگرتووه‌كان بەردەوام باسی ده‌كه‌ن، له‌گه‌ڵ قسه‌ى بریقه‌دارى ڕۆژنامه‌كان، هه‌مووى درۆیه‌ و ئه‌سڵ و ئه‌ساسى نییه‌! چونكه‌ كورد جارێ هیچى نه‌كردبوو‌، به‌ڵام ئه‌وان له‌پێناو به‌رژه‌وه‌ندییه‌كانى خۆیاندا گه‌له‌كۆمه‌كه‌یان له‌ كورد كرد.


دووه‌م: ئێمه‌ بۆمان ڕوون بووه‌وه‌ ئه‌م دنیایه‌ ئه‌و دنیایه‌ نییه‌ كه‌ خه‌ڵك لێی تێگه‌شتووه‌، به‌ڵام به‌ هه‌موو دنیامان گوت، گه‌لى كورد هه‌ر كاتێك بۆى بكرێت، یان ده‌سه‌ڵاتى هه‌بێت، جیا ده‌بێته‌وه‌ و سه‌ربه‌خۆیى ڕاده‌گه‌یه‌نێت.


سێیه‌م:‌ ئه‌و نەوەیەى چوونه‌ سه‌ر سندوقه‌كانى ده‌نگدان و ده‌نگیان به‌ سه‌ربه‌خۆیى وڵاته‌كه‌یان داوه‌، چانسێکی مێژووییان هەبووە، چونکە شتێك بوو پێش ئەوان نەبووه‌ و نابێته‌وه‌، بەو پێیەی بە دەنگدانی ئەوان، ئیتر نه‌وه‌كانى ئایینده‌ جارێكى دیكه‌ پێویستیان به‌ ڕیفراندۆم نییه‌، چونكه‌ ڕیفراندۆم تاپۆیه‌كى ڕه‌شه‌.


دەمەوێ لێرەوە سەرنجتان بۆ چەند لایەنێکی پرۆسەکە رابکێشم، بەوەی کە ئەم پرۆسەیە هەروا سادە و بەئاسانی بە ئاکام نەگەیشت. چه‌ند جارێك كۆبوونه‌وه‌ى حزبه‌كان كراوه‌ و باسی ئه‌وه‌ كراوه‌ كورد مافى خۆیه‌تى له‌م كاته‌دا ڕیفراندۆم بكات. خودى خۆم باسی ئه‌وه‌م كردووه‌، کە دواى شه‌ڕى داعش ڕه‌نگه‌ ئیشیان به‌ كورد نه‌مێنێت، چونكه‌ كورد هێزێكى سه‌ربازییه‌ و ئه‌وان سوودى لێ ده‌بینن و دەبێ بپرسیت: ئایا بۆ ئایینده‌، كورد له‌ بوارى سیاسیدا جێگه‌ى كوێ ده‌بێت؟ بە بۆچوونی من ئێمه‌ له‌ ئه‌نجامدانى ڕیفراندۆم دواكه‌وتین، ده‌بوایه‌ دواى ساڵێك له‌ شه‌ڕى داعش، ڕیفراندۆممان بكردایه‌، کەچی سەرەڕای دواخستنەکەیشی و وێڕای ئەوەی مافێکی ڕەوای خۆمان بوو، ئه‌و دنیایه‌ى كه‌ باسی مافى مرۆڤ ده‌كات، ئەوانەی خۆیان بە دۆستی ئێمە نیشان دەدا، ئەوانەی ڕۆژانە دەیانگوت کورد لەجیاتی جیهان و هەموو مرۆڤایەتی شەڕی تیرۆر دەکات، هەر هه‌موویان گه‌له‌كۆمه‌كه‌یان لێ كردین. دەی باشە خێرە ئێستا دواى ڕیفراندۆم و گەلەکۆمەکەیان، هەموویان و بەتایبەتی ئەمریکا، تەنانەت عەبادی بۆ خۆیشی کە لەشکرکێشیی کردە سەر کوردستان، داوامان لێ دەکەن ده‌نگ به‌ عه‌بادى بده‌ین، بۆ ئه‌وه‌ى جارێكى دیكه‌ بكرێته‌وه‌ به‌ سه‌رۆك وه‌زیرانى عێراق، بۆیە من پێموایه‌ شه‌رمه‌، نه‌نگییه‌ بۆ كورد، ئەگەر جارێكى دیكه‌ ده‌نگ به‌ عه‌بادییه‌ك بدات، كه‌ ئه‌وه‌ى سه‌دام پێى نه‌كردین، ئه‌و به‌رامبه‌ر به‌ گه‌لى كورد كردى، هه‌ر ده‌بابه‌كانى عه‌بادى بوون جەستەی پێشمه‌رگه‌یان شێلا، هەر هێزە میلیشیاییەکانی حکوومەتەکەی ئەو بوون ماڵى كوردیان له‌ خورماتوو ته‌قانده‌وه‌، له‌ خانه‌قین و شنگال كوردیان ده‌كوشت و ئێستاش كوردستانیان داگیر كردووه‌. لەبەرئەوە كورد ئه‌بێ چیتر بیر له‌وه‌ نه‌كاته‌وه‌، کە عه‌بادى بكاته‌وه‌ به‌ سه‌رۆك وه‌زیران له‌ عێراقدا.


خاڵێکی دیکەی گرنگی ناو پرۆسەکە، پێکهێنانی لیژنەکانی ڕاییکردنی کاروبارەکانی پرۆسەکە بوون. لەم بارەیەوە لیژنەی باڵای ڕیفراندۆم چەندین لیژنەی فەرعیی بۆ ڕاییکردنی کارەکان پێکهێنا (بۆ نموونە: لیژنەی جێبەجیکردنی ڕیفراندۆم، لیژنەی پەیوەندییەکان، لیژنەی دارایی و…..)، کە هەر لیژنەیە و كارێکی جیاواز لە کاری لیژنه‌كانی دیکەی پێ سپێردرا. جگە لەسەر ئاستی ناوخۆی و کوردستان و عێراق و ناوچەکە، ئەو لیژنانەی بۆ پەیوەندیکردن بە دونیای دەرەوە پێکهێندران، سه‌ردانى زۆربه‌ى وڵاتانى ئه‌وروپا و ئه‌مەریكا و چه‌ند وڵاتێكى دیكه‌یان كرد و به‌ڕاشكاوى لیژنه‌كه‌ به‌و وڵاتانه‌یان گوت کە ئێمه‌ ڕیفراندۆم ده‌كه‌ین. گرنگی و مێژوویی پرۆسەی ڕیفراندۆم ئەوەیە کە سەرەتا تاک و تەرا، دەنا زۆرینەی هەرە زۆری هێز و لایەنەکان له‌گه‌ڵ ئەنجامدانی ڕیفراندۆمدا بوون، بەڵام له‌دواییدا هه‌ندێك له‌ حزبه‌كان پاشه‌كشه‌یان له‌ لیژنه‌ى ڕیفراندۆم كرد کە ڕه‌نگه‌ لەو ماوەیەیەدا به‌وه‌كاله‌ت ئیشیان بۆ وڵاتێك كردبێت. کەچی خۆشییەکە ئەوەیە، هەر ئه‌وانه‌ى پاشه‌كشه‌یان له‌ لیژنه‌ى ڕیفراندۆم كرد، ڕۆژى ده‌نگدان پێش خەڵک لەسەر سندووقەکان ئامادە بوون و وێدەچوو بەئاشکرا بوێریى ئه‌وه‌یشیان نه‌بووبێت ده‌نگ به‌ ڕیفراندۆم نه‌ده‌ن، بۆیە چوونە سەر سندووقەکان و په‌نجه‌یان خسته‌ ناو مەركه‌به‌كه‌ و لە بەردەم میدیادا وایان نیشان داین، کە ده‌نگیان به‌ ڕیفراندۆمى سه‌ربه‌خۆیى كوردستان داوە.


ئەم بابەتەش سەرنجمان بۆ بابەتێکی گرنگ و پرسێکی زۆر هەستیارتری ناو پرۆسەی ڕیفراندۆم ڕادەکێشێت، ئەویش بابەت و پرسی ئەنجامدان و نەدانی ڕیفراندۆم بوو لە کەرکووک و ناوچە کوردستانییەکان. لەم بارەیەوە كۆبوونه‌وه‌ی زۆر له‌سه‌ر كه‌ركووك کرا، بۆ ئه‌وه‌ى ئایا ڕیفراندۆم له‌ كه‌ركووك بكرێ، یان نه‌كرێت؟ هه‌ندێك له‌ وڵاتانى ناوچه‌كه‌ ده‌یانگوت با ڕیفراندۆم له‌ كه‌ركووك نه‌كرێت، هه‌ندێك له‌ حزبه‌كانى ناو كه‌ركووك ده‌یانگوت، ئێمه‌ ناتوانین سه‌ركه‌وتوو بین له‌ ڕیفراندۆم له‌ناو كه‌ركووك، به‌ڵام خۆم له‌ناو كۆبوونه‌وه‌كهدا‌ بووم، کاتێک كاك مه‌سعود بارزانى پێى گوتن: “ئێمه‌ كه‌ركووك به‌شه‌ڕ بدۆڕێنین، هه‌ر ئه‌یگرینه‌وه‌، به‌ڵام به‌ ڕیفراندۆم بیدۆڕێنین، جارێكى دیكه‌ بۆمان ناگیرێته‌وه‌ و له‌ده‌ستمان ده‌رده‌چێت”، هه‌موو ئه‌وانه‌ى له‌ناو كۆبوونه‌وه‌كه‌ بوون، بوون بە دوو به‌شەوە، به‌شێكى گوتیان ئێمه‌ ڕیفراندۆم له‌ كه‌ركووك نابه‌ینه‌وه‌ و ده‌یدۆڕێنین، به‌شه‌كه‌ى دیكه‌ گوتیان ئێمه‌ ڕیفراندۆم ده‌به‌ینه‌وه‌ و سه‌رده‌كه‌وین، به‌ڵام من خۆم له‌و كۆبوونه‌وه‌یه‌ پرسیارێكم كرد و گوتم: “ئێمه‌ له‌ په‌رله‌مانى عێراق توانیومانه‌ 8 كورسی له‌ كه‌ركووك بەرین، باشه‌ ئه‌گه‌ر ڕیفراندۆم بكه‌ین بۆچى ئه‌یدۆڕێنین؟”.


لەڕاستیدا كه‌سیان بوێریى ئه‌وه‌یان نه‌بوو بڵێن، ڕیفراندۆم له‌ كه‌ركووك نه‌كرێت، كاتێكیش ڕیفراندۆم له‌ كه‌ركووك كرا، له‌ شاره‌كانى سلێمانى و هه‌ڵه‌بجه‌ و زۆربه‌ى شاره‌كانى دیكه‌ى كوردستان ده‌نگى زیاترى هێنا، هه‌وره‌ها كه‌ركووك و خانه‌قین و شنگال له‌ ناوچه‌ ئازادكراوه‌كان، یان له‌ هه‌رێمه‌كه‌ى ئێره،‌ ده‌نگی زیاتریان به‌ ڕیفراندۆم دا، چونكه‌ ئه‌وان چه‌وساندنه‌وه‌ى نەتەوەیی و نیشتمانییان له‌سه‌ر بووه‌.


بە هەرحاڵ، ئه‌وه‌ى پشتیوانیی له‌ ڕیفراندۆم كرد، بۆ وڵاته‌كه‌ى خۆى بووه‌، بۆ ئه‌وه‌ى میلله‌تێك ژێرده‌سته‌ نه‌بێ و ئازاد بێت، ئه‌وانه‌یشى كه‌ دژى ڕیفراندۆم بوون وا خۆیان نیشان ده‌دا، گوایه‌ دۆخه‌كه‌ ئاڵۆز ده‌بێت، کە ئه‌وه‌ هیچ ئه‌سڵ و ئه‌ساسێکی نەبوو، به‌ڵكوو ئه‌وانه‌ بۆ پاره‌ و به‌ قسه‌ى دوژمنانى كورد وایان کرد‌. ئه‌وانه‌ى سه‌ره‌تا دژى ڕیفراندۆم بوون، له‌ژێر كاریگه‌ریى ئه‌م و ئه‌و وڵاتدا بوون، به‌ڵام كاتێك میلله‌ته‌كه‌ى خۆیانیان بینى به‌لێشاو بۆ سه‌ر سندوقه‌كانى ده‌نگدان چوون، خۆیان پێ ڕانه‌گیرا و په‌شیمان بوونه‌وه‌ كه‌ ده‌نگ بده‌ن.


بەداخەوە، ئه‌مەریكا دژى ڕیفراندۆم بوو‌ و 16ى ئۆكتۆبه‌ریش له‌ سه‌ربازگه‌ى كه‌یوان، پێشوازییان له‌ سوپای عێراقى كرد، هه‌روه‌ها به‌ریتانیا ڕۆڵێكى زۆرى خراپى له‌ ڕیفراندۆمى سه‌ربه‌خۆیى كوردستاندا بینی، ڕۆڵێک زۆر له‌وەی سەردەمی په‌یمانى سایكس - بیكۆ خراپتر، چونكه هەر کە‌ 16ى ئۆكتۆبه‌ر سوپاى عێراق هاته‌ ناو كه‌ركووك، بۆ ڕۆژی دواتر، واتە 17ى ئۆكتۆبه‌ر، به‌ریتانیا ڕێككه‌وتنى نه‌وتیى له‌گه‌ڵ عێراقدا واژۆ كرد بۆ وەبەرهێنان لە نەوتی کەرکووکدا.


بەڵام لەگەڵ هەموو ئەو گەلەکۆمەیەشدا، ڕیفراندۆم هەرگیز بایه‌خى مێژوویی، بەڵگەنامەیی، سیاسی، یاسایی خۆی لەدەست نادات. بایەخێکی ڕیفراندۆم له‌وه‌دا بوو كه‌ كرا و ده‌نگى باشی هێنا و هەموو کوردستانی باشووری گرتەوە، بێگومان ئه‌و ڕیفراندۆمه‌ تاپۆیه‌كى ڕه‌شه‌ و له‌ گیرفانى هه‌موو تاكێكى ئه‌م وڵاته‌دایه‌. بەو مانایەی، ئه‌و ڕیفراندۆمه‌ى كه‌ كراوه‌، ڕۆژێك دێ نه‌وه‌كانى داهاتوومان سوودی لێ وەربگرن و وەک بەڵگەنامەیەکی مێژوویی و یاسایی، بۆ داواکردن و چەسپاندنی مافى گه‌لى كورد به‌كارى بهێنین.

 

*سکرتێری حزبی سۆسیالیست دیموکراتی کوردستان