ئێزدی و ڕیفراندۆم

 

پیر خدر سلێمان 18/09/2018 - 13:20 بڵاوکراوەتەوە لە ڕیفراندۆم

کوردستان نە هەر پرەکە ستراتیژییە د نیڤا رۆژهەلات و رۆژئاڤا دا، بەلکو وەڵاتەکی زەنگین و خودان ئاخەکا ب پیت و بەرکەتە، د وێ درێژاهیا مێژوویێ دا هەرتم و تم مللەتێن دراوسێ مینا عەرەب و تورک و فارسان چاڤێن وان ل خێر و بەرەکەتا ڤی وەڵاتی بوویە و ئاخا کوردستانێ بوویە مەیدانا جەنگ و شەڕ و شوڕا و گەل و مللەتێ مە د ڤان جەنگاندا بوویە سۆتەمەنی و قوربانی یە.


گەلێ کورد نەی خەمسار بوویە وی ژی بێهوودە بەرەڤانی و بەرخودان ژ ئاخا وەڵاتێ خۆ کریە، لێ گەلەک جاران ب دروشمێن بریقەدار و سۆزێن ڤالا هاتیە خاپاندن و ل داویێ هاتیە چەسپاندن و تەپەسەرکرن و هەلپەرست بووینە داردەستێن داگیرکەرێن کوردستانێ و نۆکەری ژ وان ڕا کریە. ئێزدی ژی پشکەکە ڕەسەنن ژ گەلێ کوردستانێ و ژ کنارێ زمان و ئاخ و کلتوور و هەستێ نەتەوایەتی ڤە و قەت درێغی نەکریە ژبۆ بەرەڤانی ژ ئاخا خۆ کو کوردستانە، ژ بیر و باوەرێن دێرین یێن کوردەواریێ کو ئێزدیاتی یە ژبۆ بەرز راگرتنا ئاخا خۆ زمان و چاند و باوەریا خۆ رووبارێن خوینێ کرینە قوربانی یە، دەست ژ ڤان پیرۆزیا بەرنەداینە، خۆ دیرۆکا تراژیدیا ئیزدیان و ئەو فرمان و جینۆسایدێن ئێزدییان ب سەرێ مە هاتین گرۆڤە و بەڵگەنە ژبۆ ڤێ چەندێ و ڤایە ل چەرخێ بیست و یەکێ و ل بەر چاڤ و ڕۆناهیا میدیایێن جیهانێ نفشێن وان هۆڤ و توخم پەرستا کو داعشن دیسان چاخێ دەلیڤێ خۆ دیتن فەرمانا مە ڕاکڕن.. مخابن هندەک برایێن مە یێن کورد خۆ هۆسان تێگەهاندن کو ئێزدی نە باوەرمەندن لەوا داعش و بەری نها ژی بابکالێن داعشا فەرمان ب سەرێ ئێزدییاندا دبارینن، هەتا کۆنفراسنێ مەها کانوونا یەکێ ل ساڵا ٢٠١٦ـێ ل هەولێرێ، کو ل بن ناڤێ (دیاردەی تیرۆر و ئەزموونی پێکەوەژیان لە هەرێمی کوردستان) چاخێ د سیمنارێ دا ئەز وەک ئێزدییەک من دیدا ئێزدییان د ڤی دەربارەی دا پێشکێش کری، سەرکردەیەکی پارتەکا کوردستانی گۆت: پیر خدر سەرانی داعش وا تێدەگەن ئێزدی باوەرمەند نینن بۆیە دەیانەوێن ئێوە قڕ بکەن، بزەیم بە دیدە ئەو جوامێرە هات و ناچار من گۆتێ بلا هۆسا بیت، ئەم کافرین و قڕا مە ئینان، لێ دیارە ئێوە زوو دیرۆکا تراژیدیا کوردا ژبیر دکەن بلا دوور نەچین هەر دڤی پێنجی ساڵی دا داگیرکەرێن کوردستانێ چی ب سەرێ مللەتێ مەیێ کورد ئانکو برایێ خۆ بسلمان ئینان، کێ یازدە هەزار کوردێن فەیلی بێ سەروجهـ کرن...؟ کێ هەشت بارزانی یێن بێ گونەهـ و ١٨٢ هەزار کوردێن سڤیل ل بیابا خواریا عیراقێ ب ساخی بن ئاخ کرن...؟، کێ ٥ هەزار و ٥٠٠ گوندێن کوردستانێ کاڤل و وێران کرن...؟، کێ پتر ژ ٥ هەزار سڤیلان ل هەلەبجە ب گازا ژەهرکری کیمایاباران کرن...؟ ما ئەوژی نە برایێن وان بوون و ژ دینێ وان بوون و بسلمانێن عەیار ٢٤ بوون؟! بەلێ بەری 22 هەیڤان هەر ل وێ سمینارێ من گۆتە وان ئێزدی و پێکهاتێن کوردستانێ هەر ژ خانەقین و هەتا شنگال دەڤەرا وان دامانێن کوردستانێ یە بەرۆک و سەنگەرێن پێشیێ نە، واتا گایێ سپی نە هەما ئەو دەڤەر هاتن داگیرکردن گەرا دی یا دەڤەرێن دی یێن کوردستانێ یە و هنەک خۆ تێنەگەهانت هەتا ١16ـی ئۆکتۆبەرێ ساڵا 2017 مە دیت د شەڤ و رۆژەکا نیڤەکا کوردستانێ کو پێشمەرگەی ب خوینا سەرێ خۆ رزگارکری و مە ژ دەست دا، یا مەسەلا مە و داگیرکەرێن کوردستانێ نە مەسەلا جودایا بیروبارایە. بەلکو هەر وەکی هەموو دزانن وەڵاتێ مە خودانێ ئاخەکا زەنگینە و کوردستان پرەکە ستراتیژیە د رۆژهەلاتا ناڤین و پرسگرێک و کێشەیا مە ل گەل مللەتێن دراوسێ ب چاڤ پرسی و ئەڤە کیان و دەولەتێن خۆ هەبن ڕەوایە، لێ ئەگەر گەلێ مە ل سەر ئاخا خۆ دەولەتا خۆ هەبیت ئەڤە گونەهباری و خەتایە، ئاخا وان یە پیرۆزە زمان و کەلتوورێ وان یێ پیرۆزە بەلێ ئاخا کوردستانێ و زمانێ کوردی زمانێ برا پچووکا، لێ بابکالێن مە ئێزدییان قەد باوەری ب داگیرکەران نینە، قەد پیرۆز و زمان و ئاخا خۆ ژ پیرۆزیا زمان و ئاخا کێمتر نەزانیە و ئەگەر درێژیا دیرۆکێ زۆربەی جاران برایێن مە یێن کورد هاتبنە خاپاندن و زمان و کەلتوورێ خۆ ب زمانێ برا پچووکان زانیبن، شوکر سەرکردایەتیا ڕابەڕیا شۆڕەشا ئازادیخوازا گەلێ کوردستانێ ب سەرۆک بارزانیێ نەمر و دریژەپێدانا وێ ب سەرۆکاتیا مەسعود بارزانی ب تەمامی گەهشتنە وێ باوەریێ کو بندەستی و تەپەسەری و چەوساندن ئێدی بەسە، ب هێز و بازۆیی پێشمەرگەیێ قارەمان خەتیرا شۆرەشێ هلکرن و شاراندن و دروشمێ ئۆتۆنۆمی وەک پێنگاڤا یەکێ د سالێن شێستان و هەفتیان دا و دروشمێ فیدرالیێ پشتی سەرهەلدانا ١٩٩١ـێ بلندکردن و ژێرا خەبتین و ل ڤان ساڵین داوایێ بەرەڤ ئارمانجا سەرەکی ستراتیژی پێنگاڤ هاتن ئەوبوو کار ژبۆ پرۆسێسا ریفراندۆمێ هاتنە کرن، پرانیا گەلێ مە ب ڕاوشکاوەیی بێروڕایێن خۆ راگەهاند کو نزیک ژ 93%ـێ ل 25ـی 9ـی 2017ـێ گوتن بەلێ بۆ سەربەخۆییا کوردستانێ و هەموویان دیت چاوان داگیرکەرێن کوردستانێ و دەولەتێن دراوسێ و زلهێزێن جیهانێ ژبۆ بەرژەوەندیا مللەتێن خۆ هەموو یاسایێن نیڤدەولەتی بنەمایێن مافێ مرۆڤان بن پێ کرن و دژی ئیرادا گەل و مللەتێ کوردان ڕاوەستان، لێ ئەڤ یەکە ژ وان ڕا ناچیتە سەری، هندە لازم و فەرە تفاق و تابایا گەلێ کوردستانێ یەکرێزیا پارتێن کوردستانی کو دڤێت ل ئاستێ خواست و داخوازیێن ڕەوایا گەل و مللەتێن خۆ بن کو ساڵا پار 25ـی 9ـێ ب راوشکاوەیی ب دەنگەکی بلند هزرا سەرخۆبوونا کوردستانێ ژ جیهانێ ڕاگەهاند، بۆ مە ئێزدیێن بریندار و دەڤەرێن مە ژئیک دپرت و بەڵاڤ و خەلکێ مە یێ ئاوارە و قەدەرەکێ ژێ ژبێ ئۆمیدیا هەڤرکیا نەڕەوایا پارتێن کوردستانێ ل سەر ئاخا شنگالا بریندار ڕێیا هات و نەهاتێ دایە بەرخۆ، لێ چاڤێ پرۆسەسا ڕیفراندۆمێ هاتیە ئارا و ئێزدیێن مە ب خۆڤە گۆت: جهێ مە ئیزدیخانە کو پاڕچەیەکە گرنگ و ستراتیژیە و کوردستانا مەیا دەلال مە نەڤێتە بهێتە پاڕچەکرن، خۆ ئەگەر مەغدووریەک ل ڤر یان ل دەراهە مە هەبیت، گلی و گازندە مە هەبیت، ئەم دکارین سەرکرداتیا کوردستانێ بکەین گرەنتی و ژبۆ بەرقرارکرنا مافێ مە مالا بارزان و سەرکردایەتیا کوردستانێ یە، ئەم مەغدووری و چارەنڤیسا خۆ تەڤلی هەڤ ناکەین، جەماوەرێ کوردستانێ دیت، چاوا ئێزدیێن مە سەرەرای مەغدووری و پەریشانیا خۆ پشکداری ب بەلێ د ڕیفراندۆمێ دا کر و پتر ژ 90% گۆتن بەلێ بۆ کوردستانەکا ئازاد و سەربەخۆ کو یەکسانی و وەکهەڤی تێدا بەرقرار بیت و مافێن مەیێن ئیداری و ئاینی و سیاسی و ڕەوشەنبیری تێدا بهێنە دابینکرن و ئیرۆ ژی ریفراندۆم بهێتە کرن دیسان دێ پرانیا ئێزدییان و ب ئەشقتر دێ بێژن بەلێ بۆ و مە پێ باشە سیستەمێ کۆمارا کوردستانێ فیدرالی بیت و هەروەک سەرۆک مەسعود بارزانی بانگەشەیا ڕیفراندۆمێ دا پێشنیار کری و ئەڤ پێشنیار د جهێ خۆدایە و دێ ڕی ل بانگخوازێن دەڤەر دەڤەرانێ ئێتە گرتن، چونکە ب سیستەمێ کوردستانەکا فیدرالی تایبەتمەندیا وان دەڤەران ئێتە پاراستن ژ هەموو لایان ڤە.